En Fisterra tes dúas opcións perfectas para observar o ceo. A primeira delas é o cabo Fisterra, a fin do mundo, un promontorio que se interna no mar dende unha altura de máis de 100 metros e no que poderás desfrutar dunha posta de sol de fantasía. O outro punto é o miradoiro de Mar de Fora situado a escasos metros da praia homónima e rodeado de natureza pura, onde poderás observar o ceo nocturno e as súas estrelas mentres escoitas os embates do mar sobre as pedras.
Ambos os puntos teñen unha zona para aparcar nas inmediacións, aínda que requiren de andar uns poucos centos de metros para acadar a meta. No caso do cabo Fisterra só terás que seguir a estrada (con boa sinalización) que se inicia na vila e que conecta co faro. En canto ao miradoiro de Mar de Fora terás que dar as costas a vila de Fisterra a través do Camiño da Ínsua, unha senda peonil que che levará ao teu destino.
