Desde o mércores 22 ata o domingo 26 de xaneiro celébrase en Madrid a Feira Internacional do Turismo (FITUR) 2025, unha cita de vital importancia para o turismo onde a Costa da Morte terá un papel importante. A CMAT, como asociación que representa a nivel turístico aos 17 concellos e aos empresarios da Costa da Morte, terá o seu propio espazo para destacar o territorio nesta feira internacional.
Costa da Morte, Naturalmente Salvaxe
O lema que acompañará á CMAT durante este encontro será o de «Naturalmente Salvaxe». Dúas palabras que definen moi ben o atractivo turístico do territorio. Neste sentido, o xoves 23 a partir das 18:20, a asociación presentará o seu vídeo promocional, no que se destaca a importancia da natureza salvaxe da Costa da Morte.
A Costa da Morte é un lugar indómito que, ano tras ano, demostra que a natureza non se pode domesticar. Agreste e salvaxe pero acolledora con calquera persoa que se achegue a coñecela. Desde os seus roteiros de sendeirismo, as súas praias, os seus bosques e fervenzas e o seu ceo estrelado. A Costa da Morte é un destino magnífico por descubrir.
Presenza dos concellos
Ademais da caseta da CMAT, haberá concellos da Costa da Morte que terán os seus propios espazos, nos que presentarán as súas propostas turísticas.
Vimianzo e Laxe, en colaboración coa Xunta de Galicia, presentarán un vídeo promocional sobre os penedos de Pasarela e Traba. Esta contorna natural conta cunha formación granítica singular protexida e conta cunha das mellores vistas panorámicas do territorio.
Cee será recoñecido como Destino Turístico Intelixente durante FITUR. Cee incorporouse a esta rede en 2024 e será o primeiro concello da provincia da Coruña en ser recoñecido como tal. Tamén será presentado un vídeo promocional por parte da alcaldesa, Margarita Lamela.
Camariñas terá o seu lugar na caseta de Turespaña para presentar tamén o xoves 23 pola tarde a XXXIV Mostra do Encaixe a través do cartel, un vídeo promocional e unha camiseta oficial da Mostra, deseñada por Esteban Freiría.
Dumbría presentará xunto a Vimianzo a campaña MiraQVistas, para destacar o valor turístico do miradoiro do Ézaro. Tamén a campaña inmersiva Dumbría 360º.
Outros concellos como Carnota, Muxía ou Fisterra terán os seus momentos de protagonismo en iniciativas como Solpor, Camiño Fisterra-Muxía ou a Volta da Gloria.
Podes unirte á nosa canle de Telegram para non perderte ningunha das novidades sobre a Costa da Morte.
