Pregúntaste onde atopar grafitis, murais e arte urbano en xeral na Costa da Morte? Pois estás de sorte, porque practicamente nos 17 concellos que forman este territorio poderás atopar arte. Tanto en forma de artesanía tradicional, como elementos máis vangardistas.
Costa da Morte, unha rexión situada no noroeste de Galicia, España, é famosa pola súa dramática beleza natural: penedos que se mergullan no Atlántico, faros impoñentes, praias desertas e paisaxes agrestes.
Non obstante, máis alá da súa natureza salvaxe, a Costa da Morte tamén foi testemuña dun renacemento artístico nos últimos anos grazas ao auge do arte urbano e os murais.
Este fenómeno converteu a varios dos seus concellos en galerías ao aire libre, onde a creatividade, a cultura local e o respecto pola tradición combínanse coas técnicas máis innovadoras.
Hai un concello que non só fixo dos murais a súa seña de identidade, senón que tamén celebra cada primavera un festival no que moitos artistas se dan cita para pintar ao vivo.
Queres saber máis? Pois imos entrar en detalles!
Mención especial a Yoseba MP
Este artista urbano é un dos que máis murais pintou na Costa da Morte e tamén fóra das súas fronteiras. Son moitas as obras que adornan as paredes de moitos dos nosos pobos, como é o caso de Baio, Malpica… Cando as vexas, sabrás que son del.
Especialmente a súa colección de “súper avoas”. Nestes murais o foco está sempre en mulleres rurais que loitaron na súa vida e preséntanas con algo característico, pero sempre con detalles moi humanos. Poderás atopar algúns destes murais en Carballo, no Couto ou en Muxía.
Vimianzo: máis mulleres rurais e festa
Na Praza do Concello tamén atoparás un homenaxe á muller rural, ao tempo que se destaca o paisaxe do Val de Soneira. Tamén atoparás nas paredes deste pobo un tributo á súa festa do “Asalto ao Castelo” que non se trata exclusivamente dunha festa medieval, senón que reivindica a identidade irmandiña. Unha loita que continúa.
Muxía, o mar na terra
Como adiantábamos, aquí temos unha súper avoa: “A ninja Claudina e a raspa dourada”. Unha muller que dedicou cincuenta anos da súa vida a ser percebeira. Un traballo moi perigoso e polo que Claudina xa ten o seu homenaxe no seu pobo.
Pero no porto de Muxía non atoparemos só este mural, senón que hai moitos máis murais relacionados co mar e as loitas sociais asociadas ao mesmo.
Carnota e o apóstolo
Na zona máis sur da Costa da Morte segue a haber murais. Concretamente, no porto de Portocubelo atoparémonos cun que ocupa máis de 50 metros: “Misterio e lenda no camiño”.
Este mural aspira a transmitir os valores locais e do Camiño de Santiago pola Costa.
Dumbría e o Vákner
Continuando co “Arte no Camiño”, atopamos en Dumbría a conexión do Camiño de Santiago coa lenda do Vákner. Esta lenda conta que o Vákner, que se trata dunha figura entre home e lobo, aparecíase no medio do monte aos peregrinos que facían o Camiño a través deste concello.
Fisterra: fin do Camiño
O Camiño chega a Fisterra para ver a obra “Camiñantes”. Este mural fai referencia á diversidade de persoas que fan o Camiño.
Derrubando muros con pintura e Rexenera Fest
Derrubando muros con pintura e Rexenera Fest Como indicábamos ao principio do artigo, hai un concello que non só fixo dos murais a súa seña de identidade, senón que tamén celebra cada primavera un festival no que moitos artistas se dan cita para pintar ao vivo. Este concello é Carballo, a iniciativa “Derrubando muros con pintura” e o festival, “Rexenera Fest”.
Desde 2013, Derrubando muros con pintura busca mellorar e embellecer o pobo pintando paredes, muros, edificios e rexenerando espazos deteriorados.
Cada primavera, celébrase o Rexenera Fest, un festival repleto de actividades no que se convidan a artistas de renome internacional a crear as súas obras en gran formato. Quedando a súa arte dando vida ao pobo para os anos seguintes.
Algo que caracteriza a escena do arte urbano da Costa da Morte é a colaboración entre artistas locais e internacionais. Cada mural ou intervención artística adoita ter unha historia detrás. A maioría destes proxectos nacen da cooperación entre entidades públicas e os artistas.
Os murais e o arte urbano da Costa da Morte ofrecen unha nova perspectiva desta rexión galega, permitindo aos visitantes e locais descubrir non só a súa beleza natural e cultural, senón tamén a súa creatividade e espírito.
A través dos murais, os artistas contan historias da vida mariña, a tradición xacobea e o amor pola terra e o mar, creando unha galería de arte ao aire libre que forma parte do paisaxe en si. Se tes a oportunidade de visitar esta rexión, non esquezas explorar as súas rúas, onde cada recuncho conta unha historia visual única, reflexo da identidade da Costa da Morte.
Neste artigo recollimos algúns exemplos, pero ao longo do territorio poderás atopar moitos máis. Se visitas calquera destes murais e decides subir a foto a Instagram, non dubides en etiquetarnos na nosa conta @visitacostadamorte . Agardamos que gozes moito da experiencia!
