Para comprender a importancia e o valor dos Penedos de Pasarela e Traba necesitamos coñecer como se formou este conxunto granítico e que relevancia ten dentro do noso Planeta. De sabermos que estas formas tan singulares teñen unha antigüidade duns 300 millóns de anos, que se formaron a uns 20 km de profundidade e que abundan moi pouco na Terra, a nosa apreciación cara a este espazo natural sería outra.
Segundo afirman algúns xeólogos, estes penedos xa adquiriron a configuración na profundidade anteriormente aludida hai uns 23 millóns de anos, cando estaban cubertos por unha capa de sedimentos de varios quilómetros, que desapareceu pola erosión. O xeólogo Juan Ramón Vidal Romaní, cando fala dos penedos de Pasarela e Traba defende que son unha formación única no mundo e que aínda que abunda en Galicia, escasea noutras partes do Planeta.
Por descoñecemento e por intereses económicos este senlleiro lugar anos atrás estivo a punto de ser destruída pola intención de varias empresas de instalar unha canteira neste emblemático lugar, pero grazas á mobilización e denuncia de varias asociacións lograríase frear esta posible agresión e conseguir que o goberno da Xunta de Galicia declarase este espazo natural como Paisaxe Protexida en 2008. Ultimamente aínda sufriu a ameaza da construción dun parque eólico, que tamén se paralizou.
O visitante dispón de varios accesos para chegar a estes penedos, tanto desde o Concello de Vimianzo como do de Laxe. Nós propoñemos a ruta que parte do núcleo de Pasarela e leva ao lugar do Penedo, e desde alí sae un camiño que conduce á Pedra do Barco, onde se inicia o percorrido por este extraordinario lugar natural. Seguimos pola pista de terra ata tomar un camiño á esquerda que leva ao primeiro grupo de rochas situado ao norte do alto da Cachucha. Aquí atoparemos as figuras do Cantor, o Camelo, o Coello ou o Pallaso. Preto deste conxunto atópase a Pedra Multiforme, unha das formacións máis singulares.
Deixamos esta primeira estación e dirixímonos cara á Galla de Pena Forcada, que dá nome á serra que se prolonga ata o Cabo Vilán. Despois de pasar pola Pedra Abaladoira e polo Magrebí, chegamos á segunda zona na que se atopan formas tan espectaculares como a Dama da Costa da Morte, a Zafra ou a Osa.
Continuamos, agora xa por terras do Concello de Laxe, e á beira do camiño atopámonos coa Tartaruga-Peixe ou o Xigante. Ao chegar á pista collemos á dereita, para despois tomar un camiño á esquerda que conduce ao alto da Torre da Moa, a terceira estación, desde a que gozaremos dunha extraordinaria panorámica sobre a lagoa e a Praia de Traba de Laxe. Desde esta plataforma contemplamos na proximidade as figuras do Can Enfurruñado ou a Cachola do Porco.
